Ég færi þér fjöll

Manuel er kominn til Íslands þar sem hann hefur leigt herbergi hjá eldri hjónum. Á sama tíma er Sigyn á leið til Spánar. Ferðalög þeirra virðast í fyrstu ótengd og tilviljunum orpin – eða hvað? Eftir því sem sögunni vindur fram kemur í ljós að ekkert er sem sýnist og fortíðin lifnar við. Ný saga frá höfundi Karítas án titils.

Ég færi þér fjöll er áleitin og sterk skáldsaga um mátt ástarinnar – og magnleysi, um tilviljanir og hvernig stundarákvarðanir draga dilk á eftir sér; og ekki síst að ekkert er jafnflókið og tilfinningalíf manneskjunnar.

Kristín Marja Baldursdóttir er einn vinsælasti rithöfundur landsins. Hún sló í gegn með fyrstu skáldsögu sinni Mávahlátur og með bókunum Karítas án titils og Óreiða á striga eignaðist hún stóran hóp lesenda og aðdáenda, enda eru þær í hópi dáðustu skáldsagna aldarinnar og löngu orðnar sígildar.