Heyrnarlaust lýðveldi
Nýstárleg og áhrifamikil ljóðabók sem fjallar um atburði í nefndum bæ á stríðstímum. Frásagnaraðferð skáldsins er bæði sérstæð og hrífandi, enda hefur bókin hlotið einróma lof og verið tilnefnd til verðlauna.
Þegar innrásarlið drepur heyrnarlausan dreng, verður byssuskotið það síðasta sem bæjarbúar heyra – allir missa heyrnina, en angist, reiði, skelfing og uppgjöf eru látin í ljós á táknmáli. Ljóðin eru tilfinningarík og dansa frjálslega á mörkum frásagnar og leikrits. Bókin fjallar á einstakan hátt um ást og umhyggju andspænis hatrömmum átökum sem hafa hörmulegar afleiðingar. Viðfangsefnið er sígilt, staða óbreyttra borgara þegar lífi þeirra er skyndilega umturnað vegna stríðsátaka og engin leið virðist til bjargar.
Ilya Kaminsky fæddist árið 1977 í Úkraínu, sem þá var hluti af Sovétríkjunum, en fluttist til Bandaríkjanna með foreldrum sínum ungur að árum og skrifar á ensku. Verðlaunabók hans Dansað í Ódessa kom út í íslenskri þýðingu Sigurðar Pálssonar og Sölva Björns Sigurðssonar árið 2018.