Í landi sársaukans

Alphonse Daudet (1840-1897) var einn þekktasti rithöfundur Frakka á ofanverðri nítjándu öld, einkum fyrir smásögur, skáldsögur og leikrit. Nú á tímum eru mörg af verkum hans fallin í gleymsku, en þó ekki hið sígilda Bréf úr myllunni minni sem kom út á íslensku fyrir margt löngu og svo þessi sérstæða bók.

Í landi sársaukans, sem birtist fyrst mörgum áratugum eftir lát höfundarins. Um er að ræða einskonar dagbókarskrif þar sem hann lýsir líðan sinni og í raun áralangri baráttu við banvænan sjúkdóm sem herjaði ekki síst á hina frjálslyndu listamenn fyrr á tímum. Mögulega voru þessi skrif frá hendi Daudets aðeins ætluð til úrvinnslu seinna meir, efni í skáldverk sem aldrei varð til, en þykja í seinni tíð merkileg heimild auk þess að vera stíluð af stakri snilld. Þýðing og inngangur eftir Gyrði Elíasson.