Fyrsta bók Loki: leiðarvísir fyrir prakkara

Loki er mikill prakkari en nú hefur hann gengið of langt! Óðinn sendir hann til jarðar sem 11 ára dreng sem þarf að læra að verða almennilegur – eða eyða eilífðinni með eitursnákum! Töfradagbók sem Loki þarf að halda byrjar í -3000 dyggðastigum en til að komast aftur heim í Ásgarð þarf hann að ná +3000 dyggðastigum! Getur Loki hætt að stríða?

Bókin Loki: leiðarvísir fyrir prakkara er fyrsta bók í vinsælli ritröð sem slegið hefur í gegn erlendis. Bókin er í dagbókarstíl. Þar segir frá því þegar Loki er sendur til jarðar í formi 11 ára drengs til þess að sýna Óðni og hinum ásunum fram á að hann geti lært að vera almennilegur og hætta öllum prakkarastrikum. Hann á að halda dagbók og skrá niður hvernig honum gengur en dagbókin er þeim töfrum gædd að hún veit hvenær Loki er að ljúga. Hann kemst því ekki upp með neitt múður! Í för með Loka til jarðar er Þór, þrumuguðinn sjálfur, og á hann að þykjast vera bróðir Loka. Hinsvegar þolir Loki ekki Þór, sem er alltof góður í íþróttum og vinsæll, ólíkt Loka. Heimdallur og Hyrrokkin eru einnig send til jarðar og eiga að látast vera foreldrar Loka og Þórs. Þau taka hlutverk sitt mjög alvarlega. Heimdallur drekkur í sig uppeldisráð úr ýmsum uppeldisbókum, ekki síst um uppeldi baldinna drengja, og Hyrrokkin leggur áherslu á sameiginlega göngutúra, heilsunnar og fjölskylduheildarinnar vegna, en verður líka vinsæl sem áhrifavaldur. Dagbók Loka byrjar í -3000 dyggðastigum og hann þarf að komast í +3000 dyggðastig, en líklega gengur Loka ekki sérstaklega vel í þessu verkefni sínu þar sem höfundurinn þurfti strax að hefjast handa við að skrifa aðra bók um Loka. Loki: leiðarvísir fyrir prakkara er skemmtileg bók með rætur í menningararfinum og dillandi skemmtileg lestrarupplifun. Fyrir 9-12 ára.