Morð er framið á stóra fornmunamarkaðinum sem haldinn er árlega á Österlen. Lögreglumaðurinn reglufasti, Peter Vinston, er í fríi í grenndinni og fyrir tilviljun lendir hann í því að leysa málið ásamt lögreglukonu staðarins. Þetta er önnur sagan í bókaflokknum um Österlen-morðin en sú fyrsta, Dauðinn á opnu húsi, hlaut afar góðar viðtökur.
Fróðlegt rit þar sem einsemdin er skoðuð frá ýmsum hliðum. Farið er yfir það hver eru einmana, hvenær og af hverju en jafnframt leitast við að varpa ljósi á það sem einmanaleikinn getur kennt okkur og hvernig bregðast megi við honum. Útkoman er áhugaverð bók um mikilvægi tengsla og þá merkingu sem finna má í lífinu þrátt fyrir einsemd.
Fjórða ljóðabók Þórunnar, sem er einhver fjölhæfasti rithöfundur okkar, jafnvíg á bundið og laust mál og hefur fengist við flestar greinar bókmennta. Bókin geymir á fjórða tug ljóða og yrkisefnin eru fjölbreytt, frá hverdagslífi til stærri spurninga um tilveru, ást og uppruna.
Hér tekst Sigurbjörg Þrastardóttir á við drauma, angist og undrun fólks í flaumi tímans og veitir fínstillta innsýn í íslenska þjóðarsál. Ljóðin bera skýrt handbragð skáldsins, margslungið myndmál og beitta kímni. Sigurbjörg hefur hlotið ýmis verðlaun fyrir verk sín en Flaumgosar er tíunda ljóðabók hennar.
Einlæg og snjöll myndasaga fyrir börn og unglinga sem hefur farið sigurför um heiminn. Nick og Charlie eru par en vilja halda því fyrir sig til að byrja með. En þegar þeir fara í skólaferðalag til Parísar spyrst leyndarmálið út. Munu vinir þeirra standa með þeim? Eftir bókunum hafa verið gerðir vinsælir sjónvarpsþættir á Netflix.
Fjórða myndasagan í bókaflokknum vinsæla eftir breska höfundinn Alice Oseman. Rómantískar, innilegar og skemmtilegar bækur með fallegum og raunsæjum lýsingum á unglingum. Hjartastopp hefur farið sigurför um heiminn.
Magdalena hefur verið í barnaverndarkerfinu alla ævi og dvalið á ótal fósturheimilum. Mamma hennar glímir við fíkn og nú virðist hún vera að missa fótanna aftur. Þegar Magdalena verður ástfangin af Kasiu finnur hún öryggið sem hana hefur alltaf skort. Þess vegna lætur hún allar vísbendingar um skuggalega fortíð hennar sem vind um eyrun þjóta.
Allt í náttúrunni er hluti af hringrás. Þú líka! Meltingin þín leikur nefnilega algjört lykilhlutverk þar. Heimurinn verður svo fallegur og forvitnilegur þegar við uppgötvum hvernig allt er tengt. Meira að segja kúkur, piss og prump verður bara … spennandi! Mögnuð bók úr hinum vinsæla Vísindalæsisflokki með litmyndum á hverri opnu.
Ella Stína er átta ára þegar hún fer út í heim með fjölskyldunni. Í Grikklandi er allt með öðrum brag en heima á Seltjarnarnesi. Ella Stína skottast um allt með yngri bræður sína en foreldrarnir eru yfirleitt uppteknir við skriftir. Löngu seinna kemur Ella Stína aftur til Grikklands, hvað er þá orðið af sólbökuðu fjölskyldunni sem eitt sinn var?
Þegar grindhoruð læða birtist á hjúkrunarheimili tekur öldrunarlæknirinn Eva henni fagnandi. Hún veit að gæludýr hafa góð áhrif á vistmenn slíkra stofnana og berst fyrir því að kötturinn fái að vera. Fljótlega tekur hún eftir því að allir sem læðan Mandla tekur ástfóstri við látast skömmu síðar. Getur verið að hún geti spáð fyrir um andlát fólks?
Fimm hrollvekjandi framtíðarsögur eftir krimmakónginn Nesbø. Veröld sagnanna er framandi og uggvænleg en mannlegt eðli er þó samt við sig. Ást og afbrýði, græðgi og þrá stýra gjörðum persónanna og grimmd og gæska togast á í sálarlífi þeirra. En þótt frásagnirnar séu myrkar og hryllingurinn skefjalaus lifir vonin um að mennskan sé seigasta aflið.
Þegar Gesti Eilífssyni berst óvænt sendibréf leggur hann upp í langferð. Í Ameríku kynnist hann nýjum og framandi heimi en líka áður ókunnum hliðum á sjálfum sér. Á meðan breytist allt í firðinum hans heima. Hér lýkur Hallgrímur Helgason stórvirkinu um síldarævintýrið á Segulfirði, þríleik þjóðar sem þráði betra líf, þurr gólf og ljós í tilveruna.
Í þessu smellna ævintýri, sem er ein vinsælasta barnabók sem komið hefur út á Íslandi, lifna stafirnir við sem litlir karlar og vilja ólmir fá að leika sér. Von bráðar er barnið farið að þekkja þá og hljóðin sem þeir gefa frá sér svo að lestrarnámið verður leikur einn!
Þriggja ára stúlka á Skáni er myrt í garðinum heima hjá sér. Lögreglukonan Olivia Rönning telur að morðið tengist rasisma að einhverju leyti og þegar sjö ára drengur er drepinn með sama hætti á Värmdö leikur grunur á að sami maður sé að verki. Þriðja bókin um þau Oliviu Rönning og Tom Stilton. Hraður taktur og hörkuspenna.
Valdimar Tómasson er íslenskum bókmenntaunnendum að góðu kunnur fyrir meitluð og harmþrungin ljóð sín. Söngvar til sársaukans er sjöunda ljóðabók hans en hér yrkir hann um friðlausa auðn, þungbærar tilfinningar og vonarglætuna sem smýgur í gegnum svartnættið.
Hér er ort um land og líf, gjöfult og grimmt umhverfi, hversdagsleg atvik og uppgötvanir, fortíð og óvissa framtíð, fugla og fólk. Tæpasta vað er önnur ljóðabók Jóns Hjartarsonar, leikara og rithöfundar.
Violette er kirkjugarðsvörður í litlu þorpi í Frakklandi. Þegar sársaukafull fortíðin ryðst óvænt inn í friðsælt líf hennar neyðist hún til að rifja upp leiðina til heilunar og bata. Þetta er hrífandi saga um sorg og seiglu, einmanaleika og lífsfyllingu, móðurást og vináttu. Bók sem hefur heillað lesendur víða um heim og selst í milljónum eintaka.
Leena er send í leyfi eftir stórbrotið klúður í vinnunni. Hún heimsækir ömmu sína sem reynist líka standa á tímamótum. Þær ákveða að hafa vistaskipti, amman fer til London og Leena ætlar að lifa rólegu lífi í litlu þorpi. Þar með upphefjast mikil ævintýri.